മമ്മുക്കയെ കണ്ട കഥ

 എന്റെ ഒരു സുഹൃത്തിന്റെ അച്ഛൻ പണ്ട് ഒരു മാധ്യമ സ്ഥാപനത്തിൽ ആയിരുന്നു ജോലി ചെയ്തിരുന്നത്. ആ സ്ഥാപനത്തിന്റെ ചെയർമാൻ സാക്ഷാൽ മമ്മുക്ക ആണ്.

കോളേജിൽ പഠിക്കുന്ന സമയത്ത് ഒരു ദിവസം ഇവൻ എന്നേ വിളിച്ചിട്ട് ചോദിച്ചു, തൊടുപുഴ വരെ പോകുവാ കൂടെ വരുന്നോ എന്ന്, വരുന്നുണ്ടെങ്കിൽ നല്ല ഡ്രസ്സ്‌ ഒക്കെ ഇടണം കാരണം അവിടെ ഒരു സിനിമയുടെ ഷൂട്ടിംഗ് നടക്കുന്നുണ്ട്.

അങ്ങനെ ഞാൻ ഒരുങ്ങി കുട്ടപ്പനായി അവൻ വരുന്നതും കാത്തിരുന്നു. വന്നപ്പോൾ അവൻ ഒറ്റക്കല്ല അച്ഛനും കൂടെയുണ്ട്, ചാനൽ ആയിട്ട് ബന്ധപ്പെട്ട കുറച്ചു ചർച്ചകൾക്ക് വേണ്ടിയാണ് പോകുന്നത്, അദ്ദേഹം അവിടെ ഒരു ഉയർന്ന പൊസിഷനിൽ ആയിരുന്നു അന്ന്.

അപ്പോൾ ഞാൻ ചോദിച്ചു, മമ്മുക്കയെ കാണാൻ വല്ലതും ആണോ... 🫣

അവൻ പറഞ്ഞു, അതേ...

അതുവരെ ഇല്ലാതിരുന്ന ഒരു ആകാംഷ അതോടെ എനിക്ക് ഉണ്ടായി. തൊടുപുഴ റൈഫിൾ ക്ലബ്ബിൽ കിങ് and the കമ്മിഷണർ എന്ന സിനിമയുടെ ഷൂട്ടിംഗ് നടക്കുന്നുണ്ട്, അവിടേക്കാണ് ഞങ്ങൾ പോകുന്നത്.

അങ്ങനെ ഏതാണ്ട് ഒരു മണിക്കൂറിനു ശേഷം ഞങ്ങൾ ലൊക്കേഷനിൽ എത്തി, ഞാൻ ആണെങ്കിൽ ആദ്യമായിട്ടാണ് ഒരു സിനിമയുടെ ഷൂട്ടിംഗ് സ്ഥലത്ത് പോകുന്നത്. അതിനാൽ അവിടെ കാണുന്ന കാഴ്ചകൾ എല്ലാം കൗതുകം ആയിരുന്നു, എന്നിരുന്നാലും ആദ്യമായ് മമ്മുക്കയെ നേരിട്ട് കാണുന്നതിന്റെ ആകാംഷ തന്നെയായിരുന്നു മുന്നിൽ.

അങ്ങനെ ഞങ്ങൾ ഒരു ബിൽഡിംങ്ങിന്റെ ഉള്ളിലേക്ക് കയറി, ഒരാൾ മുകളിൽ ഉണ്ടെന്ന് ആംഗ്യം കാണിച്ചത് അനുസരിച്ചു മുകളിലേക്ക് കയറി.

അവിടെയൊക്കെ ഒരുപാട് ആളുകൾ നിൽപ്പുണ്ട്, അവരുടെ ഇടയിലൂടെ മുകളിലേക്ക് കയറി ചെന്നത് വിസിറ്റിംഗ് ഏരിയയിലേക്കാണ്, ദാ അവിടെ സോഫയിൽ ഇരിക്കുന്നു സാക്ഷാൽ മമ്മുക്ക.

അവർ തമ്മിൽ ഗ്രീറ്റ് ചെയ്ത ശേഷം അവനോടും എന്തോ വിശേഷങ്ങൾ ചോദിച്ച ശേഷം എന്നേ നോക്കി ഇതാരാണ് എന്നൊരു ചോദ്യം കൂടി 😄...

അപ്പോൾ അവൻ പറഞ്ഞു കൂട്ടുകാരൻ ആണ് ഒരുമിച്ചാണ് പഠിക്കുന്നത് എന്ന്..

അപ്പോ മമ്മുക്കയുടെ വക ഒരു ഡയലോഗും കൂട്ടൊക്കെ കൊള്ളാം പരീക്ഷക്ക് ഉഴപ്പി നടന്നേക്കരുത്... (ഡയലോഗ് കൃത്യമായി ഓർക്കുന്നില്ല പക്ഷേ ഇത്തിരി ഗൗരവത്തിൽ ഇതുപോലെ ഒരു ഡയലോഗ് ആയിരുന്നു )

ശേഷം അവർ ഒഫീഷ്യൽ കാര്യങ്ങൾ മാറിയിരുന്നു സംസാരിക്കാൻ ആരംഭിച്ചു, ഞാൻ ആണെങ്കിൽ അവനോട് ഒരു ഫോട്ടോ എടുക്കുന്ന കാര്യം പതിയെ ചോദിച്ചു, പക്ഷേ അവൻ പറഞ്ഞു, ഇന്ന് മമ്മുക്കയുടെ മൂഡ് അത്ര ശരിയല്ല, പിന്നെ നോക്കാം എന്ന്.. അതിനാൽ ഒരു സെൽഫി പോലും എടുക്കാൻ കഴിഞ്ഞില്ല..

മീറ്റിംഗ് കഴിഞ്ഞു അന്ന് ഞങ്ങൾ ഷൂട്ടിംഗ് ലൊക്കേഷനിൽ നിന്നാണ് ഉച്ച ഭക്ഷണവും കഴിച്ചത്. അതിന് ശേഷം ഒരു രംഗം ഷൂട്ട്‌ ചെയ്യുന്നത് കാണാനും അവസരം ലഭിച്ചു.

സിനിമയുടെ ഏതോ ഒരു രംഗത്ത് മമ്മുക്ക ഒരു തൂണിന്റെ പിന്നിൽ നിന്നും പിറകിലേക്ക് ചാഞ്ഞു എന്തിനെയോ സൂക്ഷിച്ചു നോക്കുന്ന ഒരു ഭാഗമുണ്ട്, അത് ഷൂട്ട്‌ ചെയ്യുമ്പോൾ ഒരു വശത്തു ഞാനും അവനും നിൽപ്പുണ്ട് പക്ഷേ അതൊന്നും ക്യാമറയിൽ ഇല്ല, അങ്ങനെ ഒരു ആൾക്കൂട്ടം ഉള്ള രീതിയിൽ ഉള്ള ഷോട്ട് അല്ലാത്തതിനാൽ ആണത്...

ഒരിക്കലും പ്രതീക്ഷിക്കാത്ത നല്ലൊരു അനുഭവം ആയിരുന്നു അത്..