Interstellar

 നമ്മൾ വസിക്കുന്ന ഈ ഭൂമി വാസയോഗ്യം അല്ലാതായാൽ എന്ത് ചെയ്യാൻ പറ്റും, മറ്റ് ഏതെങ്കിലും ഗ്രഹങ്ങൾ കണ്ടെത്തി അവിടേക്ക് കുടിയേറണം. 

ഇങ്ങനെ ഒരു കഥ സിനിമയാക്കി അവതരിപ്പിക്കാൻ ഒരു ശാസ്ത്രജ്ഞൻ സംവിധായകൻ ആകേണ്ടി വരും, അങ്ങനെ ഒരാൾ 2014 ൽ വന്നു, ഇരുപതിയൊന്നാം നൂറ്റാണ്ടിന്റെ മധ്യത്തിൽ നടക്കുന്ന ഒരു കഥയായി ഇതിനെ നമ്മുടെ മുന്നിൽ അവതരിപ്പിച്ചു..

അതാണ് Interstellar - 2014, സംവിധാനം ക്രിസ്റ്റോഫർ നോളൻ.. ഒരു സയൻസ് ഫിക്ഷൻ സിനിമ എന്നതിനപ്പുറം സയൻസ് ക്ലാസ്സ്‌ എന്നോ അല്ലെങ്കിൽ ഇതുവരെ ഇറങ്ങിയ ഏറ്റവും മികച്ച സിനിമയെന്നോ, അല്ലെങ്കിൽ ഒരു അച്ഛനും മകളും തമ്മിലുള്ള ആത്മബന്ധത്തിന്റെ ആഴം കാണിച്ചുതരുന്ന സിനിമയെന്നോ പറയാൻ കഴിയുന്ന ഒരു അത്ഭുതം.

വിഭാര്യനായ കൂപ്പർ നാസയിൽ പൈലറ്റ് ആയി പ്രവർത്തിച്ചിരുന്ന ഒരു വ്യക്തിയായിരുന്നു. എന്നാൽ അദ്ദേഹം അവിടെ നിന്ന് വിരമിച്ചതിനു ശേഷം തന്റെ രണ്ട് മക്കളോടൊപ്പം കൃഷി ഒക്കെ ചെയ്ത് ജീവിച്ചു പോരുകയാണ്.

ഇദ്ദേഹം മാത്രമല്ല ഭൂമിയിൽ ഉള്ള ഭൂരിപക്ഷം ആളുകളും ഇത്തരത്തിൽ ജോലിയെല്ലാം ഒഴിവാക്കി കൃഷി ചെയ്യുകയാണ്. ഇതിന് കാരണം എന്തെന്നാൽ ഭൂമി പതിയെ ഇല്ലാതാവുകയാണ്.

ബ്ലൈറ്റ് എന്നൊരു വൈറസ് ഭൂമി മുഴുവൻ പടർന്നു പിടിച്ചു, മനുഷ്യരിൽ അല്ല മനുഷ്യർ ഭക്ഷിക്കുന്ന വിളകളേയാണ് ഈ വൈറസ് ബാധിക്കുന്നത്, അങ്ങനെ ഒരുവിധം വിളകളെല്ലാം എന്നെന്നേക്കുമായി നശിച്ചുപോയി. ആകെ ബാക്കിയുള്ളത് ചോളം മാത്രമാണ്.

അത് മാത്രമല്ല ഭൂമിയിൽ ഉള്ള ചെടികളും മരങ്ങളും നശിച്ചതിനാൽ ഒരു ചെറിയ കാറ്റ് അടിച്ചാൽ പോലും അത് വളരെ വലിയ പൊടിക്കാറ്റ് ആയിട്ടാണ് അനുഭവപ്പെടുന്നത്. 

കൂപ്പറിന് രണ്ട് മക്കളാണ് ഉള്ളത്, മൂത്ത മകനായ ടോം, ഇളയ മകളായ മർഫ്. മർഫിനു ചില വിചിത്രമായ അനുഭവങ്ങൾ ഉണ്ടാവാറുണ്ട്, അവളുടെ റൂമിൽ ഉള്ള ഷെൽഫിൽ നിന്നും ഇടക്ക് പുസ്തകങ്ങൾ തനിയെ താഴേക്ക് വീഴുകയും, ആരോ തന്നോട് സംസാരിക്കാൻ ശ്രമിക്കുന്നത് പോലെയൊക്കെയും അവൾക്ക് തോന്നാറുണ്ട്.

അതുകൊണ്ട് തന്റെ മുറിയിൽ ഏതോ പ്രേതമുണ്ട് എന്നൊക്കെയാണ് അവൾ കരുതുന്നത്.

അങ്ങനെ ഒരു ദിവസം പൊടിക്കാറ്റ് വന്നപ്പോൾ അവൾ തന്റെ മുറിയുടെ ജനൽ അടക്കാൻ മറന്നുപോയിരുന്നു, അത് അടക്കാൻ അവളോടൊപ്പം കൂപ്പറും അവിടേക്ക് ചെന്നപ്പോൾ നിലത്തു വീണു കിടക്കുന്ന പൊടിയിൽ അവർ ഒരു അടയാളം കണ്ടു.

അതൊരു കോഡ് ആണെന്ന് മനസിലാക്കിയ കൂപ്പർ അവിടെ ഭൂമിയുടെ ഗ്രാവിറ്റിയിൽ ഏറ്റക്കുറച്ചിലുകളും കണ്ടെത്തുന്നു.

തുടർന്ന് ആ കോഡ് ഡീക്കോട് ചെയ്തപ്പോൾ അവർക്ക് ഒരു സ്ഥലത്തിന്റെ അഡ്രസ് ലഭിക്കുകയും കൂപ്പർ അവിടേക്ക് പുറപ്പെടുകയും ചെയ്യുന്നു.

അത് നാസയുടെ ഒരു രഹസ്യ സങ്കേതത്തിന്റെ അഡ്രസ് ആയിരുന്നു. അവിടെ എത്തിയ കൂപ്പർ അവരുടെ ഒരു ദൗത്യത്തിന്റെ ഭാഗമാകാൻ തീരുമാനിക്കുന്നു.

നമ്മുടെ സൗരയൂധത്തിനൊക്കെ പുറത്ത് ഒരുപാട് പ്രകാശവർഷം അകലെ വാസയോഗ്യം എന്ന് കരുതപ്പെടുന്ന ഏതാനും ചില ഗ്രഹങ്ങൾ കണ്ടെത്തിയ അവർ അവിടേക്ക് പെട്ടന്ന് പോകാൻ ഒരു വഴിയും കണ്ടെത്തിയിരുന്നു.

തിരിച്ചു വരുമോ എന്നുപോലും ഉറപ്പില്ലാത്ത ആ യാത്രയിൽ കൂപ്പറും ചേരുന്നു, തന്റെ മകളെ ഏറെ പ്രയാസപ്പെട്ടു അയാൾ സമാധാനിപ്പിക്കുന്നു. തിരിച്ചു വരുമെന്ന് വാക്കും കൊടുക്കുന്നു.

തുടർന്നുള്ള മായ കാഴ്ചകളാണ് നോളൻ നമ്മുടെ മുന്നിൽ അവതരിപ്പിക്കുന്നത്. ചില ശാസ്ത്ര തത്വങ്ങൾ മനസിലാക്കാൻ നമ്മൾക്ക് നന്നേ പ്രയാസം തോന്നിയേക്കാം.

പക്ഷേ എന്താണ് സംവിധായകൻ പറയാൻ ശ്രമിക്കുന്നത് എന്ന് കിട്ടി തുടങ്ങിയാൽ പിന്നെ രോമാഞ്ചത്തോട് കൂടിയല്ലാതെ ഈ സിനിമ കാണാൻ സാധിക്കുകയില്ല.

എന്തിനേറെ ആ പേര് കേൾക്കുമ്പോൾ പോലും രോമാഞ്ചം ഉണ്ടാവും. അതാണ് interstellar എന്ന അത്ഭുതം..

സിനിമ ഇറങ്ങിയതിന്റെ പത്താം വാർഷികം പ്രമാണിച്ചു ഏഴ് ദിവസത്തേക്ക് ചിത്രം വീണ്ടും തിയേറ്ററിൽ ഇപ്പോൾ ഇറങ്ങിയിട്ടുണ്ട്, അതും ഐ മാക്സ് ക്വാളിറ്റിയിൽ.

പലരും ദൂര ദേശങ്ങളിൽ നിന്നുപോലും യാത്ര ചെയ്ത് ഐ മാക്സിൽ വീണ്ടും കാണാൻ പോകുന്ന അത്ഭുത പ്രതിഭാസമാണ് ഇപ്പോൾ കാണുന്നത്..

ഇനിയും കണ്ടിട്ടില്ലാത്തവർ കാണാൻ ശ്രമിക്കുക the best movie ever made...