ടെർമിനേറ്റർ അണ്ണൻ

 ഏഴാം ക്ലാസ്സിൽ പഠിക്കുബോഴാണ് എന്റെ അതേ പേരുള്ള കൂട്ടുകാരൻ ഒരു ഇംഗ്ലീഷ് സിനിമയുടെ കഥ എന്നോട് പറയുന്നത്. ഒരു പയ്യനെ കൊ**നായിട്ട് ഭാവിയിൽ നിന്നൊരു റോബോട്ട് ടൈം ട്രാവൽ ചെയ്ത് വരുന്നു.

ആ റോബോട്ടിന് രൂപം മാറാനുള്ള കഴിവുണ്ട്, എത്ര പീസ് ആയിട്ട് പോയാലും വെള്ളം കൂടി ചേരുന്നത് പോലെ അതിന്റെ ഭാഗങ്ങൾ വീണ്ടും കൂടി ചേർന്ന് വരും..

ഇങ്ങനെ ഒരു റോബോട്ട് ആക്രമിക്കാൻ വന്നാൽ എങ്ങനെ ഇതിലെ പയ്യൻ രക്ഷപെടുമെന്നായി എന്റെ കൗതുകം, അപ്പോഴാണ് അവൻ മറ്റൊരാളുടെ കാര്യം പറയുന്നത്, ആ പയ്യനെ രക്ഷിക്കാൻ മറ്റൊരു റോബോട് കൂടി ഇതുപോലെ ടൈം ട്രാവൽ ചെയ്ത് വരുന്നുണ്ട്.

വില്ലൻ റോബോട്ടിന്റെ അത്രയും കഴിവുകൾ ഒന്നുമില്ല പക്ഷേ ഒരു അഡാറു മുതലാണ് ആ റോബോട്ട്.

പയ്യനെ അന്വേഷിച്ചു ആദ്യമേ എത്തുന്നത് വില്ലൻ റോബോട്ടാണ്, അവൻ അതിന്റെ അടുത്ത് നിന്ന് രക്ഷപെടാൻ വേണ്ടി തന്റെ ബൈക്കിൽ സാഹസികമായി ഒരു റൈഡ് ഉണ്ട്, എന്നാൽ വില്ലൻ റോബോട്ട് ഒരു ട്രക്ക് തട്ടിയെടുത്തു അവന്റെ പിന്നാലെ ചെല്ലുന്നു.

അവൻ ഒരു കനാൽ വഴിയൊക്കെ ബൈക്ക് പറപ്പിച്ചു നോക്കി, എന്നിട്ടും വില്ലൻ പിന്മാറുന്നില്ല, ഒടുവിൽ അവനെ പിടികൂടും എന്ന അവസ്ഥ ആയപ്പോഴാണ് നമ്മുടെ അണ്ണന്റെ വരവ്,

ഒരു ഹാർലി ഡേവിഡ്സൺ ബൈക്കിൽ ചങ്കും വിരിച്ചു ഒരു വരവുണ്ട്, ഒരു കോഴിക്കുഞ്ഞിനെ പൊക്കുന്ന പോലെ പയ്യനെ അവന്റെ ബൈക്കിൽ നിന്നും ഒറ്റ കൈകൊണ്ട് പൊക്കി തന്റെ ബൈക്കിന്റെ മുന്നിലേക്ക് ഇരുത്തിയിട്ട് സൈഡിൽ കിടക്കുന്ന തോ**ക്ക് എടുത്ത് വട്ടം കറക്കി അണ്ണന്റെ രണ്ട് ഷോട്ട് ഉണ്ട്, അതോടെ ട്രക്ക് തവിടുപൊടി..

എന്നാലും വില്ലൻ റോബോട്ട് അല്പ സമയം കഴിയുമ്പോൾ വീണ്ടും ഒരുമിച്ച് കൂടി ഉണ്ടായി വരുന്നുണ്ട്.. പിന്നീട് അങ്ങോട്ട് ഇവർ തമ്മിലുള്ള പോരാട്ടമാണ്.

അവൻ കഥ പറഞ്ഞപ്പോഴേക്കും തന്നെ ഞാൻ ആകെ ആവേശഭരിതനായി, പക്ഷേ അവൻ പറഞ്ഞ അർനോൾഡ് ആരാണെന്ന് എനിക്ക് അറിയില്ലായിരുന്നു, അത് കേട്ടപ്പോ അവനും അതിശയം, ഇത്രയും മസ്സിൽ ഒക്കെയുള്ള ലോക ചാമ്പ്യൻ ആയിരുന്ന പിന്നീട് ഹോളിവുഡ് ആക്ഷൻ സിനിമകളിലെ ഇത്രയും വലിയ താരത്തെ അറിയില്ലേ എന്നായി അവൻ..

എന്തായാലും സിനിമയുടെ പേരൊക്കെ ഞാൻ അവനോട് ചോദിച്ചു മനസിലാക്കി വച്ചു, എപ്പോഴെങ്കിലും ടീവിയിൽ വരുമ്പോൾ കാണാമല്ലോ..

അന്നൊക്കെ സ്ഥിരമായി പത്രത്തിൽ ഓരോ ചാനലിലും വരുന്ന സിനിമകളുടെ പേര് നോക്കുന്ന പതിവ് ഉണ്ടായിരുന്നു, സ്കൂൾ സമയം കഴിഞ്ഞാൽ മിക്കവാറും സമയം ടീവിയുടെ മുന്നിൽ തന്നെയും ആയിരിക്കും.

അങ്ങനെ ഒരു ദിവസം ഞാൻ നോക്കുമ്പോൾ ദേ കാണാൻ കാത്തിരുന്ന ആ സിനിമ സ്റ്റാർ മൂവിസിൽ..

Terminator 2 : The Judgement Day...

സിനിമ കണ്ട് തുടങ്ങിയപ്പോഴാണ് വീണ്ടും കിളി പോയത്, മസ്സിൽ ഒക്കെയുള്ള ഒരു മച്ചാൻ ആണ് നായകൻ റോബോട്ട് ആയിട്ട് വരുന്ന അർനോൾഡ് എന്നൊക്കെ കെട്ടിരുന്നെങ്കിലിം എന്റെ ഭാവനയ്ക്കും അപ്പുറമായിരുന്നു മൂപ്പരുടെ ശരീരം.

അതുവരെ കണ്ടിട്ടുള്ള മസ്സിൽമാൻമാർ പുള്ളിയുടെ മുന്നിൽ ഒന്നുമല്ല എന്ന് മാത്രമല്ല ഇങ്ങനെ ഒക്കെ മനുഷ്യന്മാർ ഭൂമിയിൽ ഉണ്ടോ അതോ ഇനി ശരിക്കും റോബോട്ട് ആയിട്ട് ഉണ്ടാക്കിയതാണോ എന്നൊക്കെ ഓർത്തുപോയി.

കഥ മുഴുവൻ കേട്ടത് ആണെങ്കിൽ കൂടി അത് കാണുമ്പോൾ ആവേശത്തിന് ഒരു കുറവും ഉണ്ടായില്ലായിരുന്നു, അത്രക്ക് കിടിലൻ.

അതിലും രസം പിന്നീട് ഒരുപാട് നാളുകൾക്ക് ശേഷമാണ് ഈ സിനിമ റിലീസ് ആയ വർഷം ശ്രദ്ധിക്കുന്നത് - 1991..

അവൻ കഥ പറഞ്ഞപ്പോൾ ഏതോ പുതിയ സിനിമ ഇറങ്ങിയതിന്റെ ആണെന്നൊക്കെ വിചാരിച്ചിരുന്ന ഞാൻ...

എന്നാലും ആ ഹാർലി ഓടിച്ചോണ്ടുള്ള വരവ്, ഇപ്പോഴും വല്ലപ്പോഴും ഇരുന്ന് കാണും...