ഇന്ദർ ഒരു അഡ്വക്കേറ്റ് ആണ്, അയാൾ വലിയ ഒരു കേസ് ജയിച്ചു കോടതിയിൽ നിന്നും പുറത്തേക്ക് വരികയാണ്. എല്ലാവരും അയാളെ അഭിനന്ദിക്കുന്നുണ്ട്, പക്ഷേ അയാളുടെ മുഖത്തു യാതൊരു സന്തോഷവുമില്ല.
തന്റെ ആഡംബര കാറിൽ കയറി അയാൾ തനിയെ ഓടിച്ചു പോകുന്നു, വലിയ ഒരു കൊട്ടാരം പോലുള്ള വീടിന്റെ കോമ്പൗണ്ടിലേക്ക് ആ കാർ പ്രവേശിക്കുകയാണ്. അയാൾ നേരെ വീടിന്റെ ഉള്ളിലേക്കു പോയി ഒരു വൈൻ കുപ്പിയും ഗ്ലാസും എടുത്ത് അതി മനോഹരമായ പൂന്തോട്ടത്തിലേക്ക് പോകുന്നു.
അവിടെ മുഴുവൻ പൂക്കൾ നിറഞ്ഞ വലിയ മരങ്ങളാണ്, അതിൽ പിങ്ക് നിറത്തിലുള്ള പുഷ്പങ്ങൾ നിറഞ്ഞ ഒരു മരത്തിനു ചുവട്ടിലേക്ക് അയാൾ ചെന്നതും, അയാളെ അഭിനന്ദിക്കാൻ എന്നതുപോലെ കുറച്ചു പൂക്കൾ ആ മരത്തിൽ നിന്നും അയാളുടെ ദേഹത്തേക്ക് വീഴുന്നു. നിറഞ്ഞ കണ്ണുകളോടെ അയാൾ മരത്തിനു അടുത്തേക്ക് ചെന്നു അതിൽ തലോടുന്നു.
അവിടെ ഒരു എഴുത്ത് കൊത്തി വച്ചിരിക്കുന്നത് അപ്പോഴാണ് നമ്മൾ കാണുന്നത്. അത് ഇങ്ങനെയായിരുന്നു
Saraswati Parihaar
1994 - 2015
പിന്നീട് കഥ ഒരു ഫ്ലാഷ് ബാക്കിലേക്ക് പോകുകയാണ്,...
മഹാ തെമ്മാടിയായിരുന്ന ഇന്ദർ ഒരു അപ്പാർട്മെന്റിൽ വാടകയ്ക്ക് താമസിക്കുകയായിരുന്നു. ഏതോ കൊലപാതക കേസിൽ അയാൾ എട്ട് വർഷം ജയിലിൽ ശിക്ഷയും അനുഭവിച്ചിട്ടുണ്ട്.
അതേ ബിൽഡിംങ്ങിന്റെ തൊട്ട് മുകളിൽ ഉള്ള നിലയിൽ ആരുന്നു സരസ്വതിയുടെ കുടുംബം താമസിച്ചിരുന്നത്. അവർ ഒരു തെലുങ്ക് ബ്രാഹ്മണ കുടുംബമായിരുന്നു. അവളോടൊപ്പം അച്ഛനും അമ്മയും ഇളയ സഹോദരിയും ഉണ്ടായിരുന്നു.
ഇന്ദറിനെ കാണാൻ അയാളുടെ കാമുകി പലപ്പോഴും ആ അപ്പാർട്മെന്റിൽ വരുമായിരുന്നു, ഇതൊക്കെ കാണുന്നതിനാൽ സരസ്വതി ഉൾപ്പെടെ എല്ലാവർക്കും അയാളോട് വെറുപ്പ് തോന്നിയിരുന്നു.
സരസ്വതിക്ക് ഒരു പ്രശ്നം ഉണ്ടായിരുന്നു, അവളുടെ വിവാഹം നടക്കുന്നില്ല, അവളെ കാണാൻ വന്ന പല ചെക്കന്മാരെയും അവൾക്ക് ഇഷ്ടമായിരുന്നെങ്കിലും അവർക്കൊന്നും അവളെ ഇഷ്ടപ്പെടുന്നില്ലായിരുന്നു. അവളെ കണ്ടാൽ ആന്റി ലുക്ക്‌ ആണെന്ന് ഉൾപ്പെടെ പല പരിഹാസവും അവൾക്ക് കേൾക്കേണ്ടി വന്നിട്ടുണ്ട്.
ഇത് കൂടാതെ അവളുടെ അനുജത്തിക്ക് ഒരു പ്രണയമുണ്ട് എന്നാൽ ചേച്ചിയുടെ വിവാഹം നടന്നാൽ മാത്രമേ അവളുടെ വിവാഹവും നടക്കു എന്ന് അവരുടെ അച്ഛന്റെ നിർബന്ധ ബുദ്ധി കാരണം സരസ്വതി ആകെ വിഷമത്തിലായിരുന്നു.
അവളുടെ വിവാഹം ഒന്നും ശരിയാകുന്നില്ല എന്നും പറഞ്ഞു അവളുടെ അനുജത്തി എപ്പോഴും അവളോട് ദേഷ്യപ്പെടുമായിരുന്നു.
വലിയ ഒരു വക്കീലിന്റെ മകനായിട്ടും വഴി തെറ്റി തെമ്മാടിയായിപ്പോയ ഇന്ദറും സരസ്വതിയും എങ്ങനെ പ്രണയത്തിൽ ആയെന്നും അവൾക്ക് പിന്നീട് എന്ത് സംഭവിച്ചെന്നും ഇന്ദർ എങ്ങനെ തന്റെ വഴിവിട്ട ജീവിതത്തിൽ നിന്നും കര കയറിയെന്നുമാണ് പിന്നീടുള്ള കഥ.
ഹൃദയസ്പർശിയായ ഒരു ഇമോഷണൽ ലവ് സ്റ്റോറി ആയിരിന്നിട്ട് കൂടി ചിത്രം റിലീസ് ചെയ്തപ്പോൾ പരാജയപ്പെടുകയാണ് ഉണ്ടായത്. വെറും 9 കോടി മാത്രമായിരുന്നു ചിത്രത്തിന് ലഭിച്ച കളക്ഷൻ.
എന്നാൽ പിന്നീട് ചിത്രത്തിന് അന്യായ ഫാൻ ബേസാണ് ഉണ്ടായത്, ഫോണിലും ടീവിയിലും കണ്ട പലരും തിയേറ്ററിൽ പോകാത്തതിനെ ഓർത്ത് പഴിച്ചു.
അങ്ങനെ ഒടുവിൽ ഒൻപതു വർഷങ്ങൾക്ക് ശേഷം പടം ഒരിക്കൽ കൂടി റീ റിലീസ് ചെയ്തു നിർമ്മാതാക്കൾ. എല്ലാവരെയും ഞെട്ടിച്ചു കൊണ്ട് ഇതുവരെ വാരിക്കൂട്ടിയത് 40 കോടിയാണ്.
ചില കഥകൾ അങ്ങനെയാണ്...
Sanam Teri Kasam (Hindi) - 2016
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ