പണ്ട് ഞങ്ങൾ ഒരു ടീം ഉണ്ടാക്കി ഫുട്ബോൾ ചെറിയ രീതിയിൽ കളിച്ചു നടന്ന കാലം, അന്ന് പരിചയത്തിൽ ഉള്ള ഒരാളുടെ നാട്ടിൽ അയാൾ കളിക്കുന്ന ടീം ഉണ്ട് ചുമ്മാ മത്സരിക്കാൻ വരുന്നോ എന്ന് ചോദിച്ചു.
അയാൾ ഉൾപ്പെടെ ഭൂരിപക്ഷം ആളുകളും നാൽപതിന് മുകളിൽ പ്രായം ഉള്ളവർ ആണെന്നും പറഞ്ഞു. നന്നായി കളിക്കുന്ന ടീംമൊന്നും അല്ല ഞങ്ങളുടെ എന്നിട്ട് പോലും അവരെ ഇപ്പോൾ തോൽപ്പിച്ചേക്കാം എന്നായിരുന്നു ഞങ്ങളുടെ എല്ലാം ഉള്ളിൽ.
അങ്ങനെ ഒരു ദിവസം ഞങ്ങൾ അവരുടെ ഗ്രൗണ്ടിൽ കളിക്കാൻ ചെന്നു, അവരുടെ ടീം വന്നപ്പോ ദേ ഒരു മെലിഞ്ഞു പ്രായമായ ചേട്ടൻ കൈലിമുണ്ടൊക്കെ മടക്കി കുത്തി മുന്നിൽ വന്നു നിൽക്കുന്നു, അവരുടെ മെയിൻ സ്ട്രൈക്കർ ആയിരിക്കുമെന്നൊക്കെ ഞങ്ങൾ തമാശക്ക് പറയുന്നുണ്ടായിരുന്നു. എന്നിട്ട് കളി തുടങ്ങിയതും ഇയാളുടെ കയ്യിൽ പന്ത് കിട്ടിയാൽ അപ്പോ വരും വെടിയുണ്ട പോലെ ഞങ്ങളുടെ ഗോൾ പോസ്റ്റിലേക്ക് ഓരോ കിക്ക്. കുറച്ചു നേരം ഞാനും ഗോളി നിന്നിരുന്നു, അയാളുടെ തൊഴിയുടെ പവർ അന്നേരമാണ് ശരിക്കും അങ്ങോട്ട് കിട്ടിയത്.
കൈ ഓടിയാതെ രക്ഷപെട്ടത് ഭാഗ്യമെന്ന് പറഞ്ഞാൽ മതി 😅. എന്തായാലും അന്നത്തെ കളി ഞങ്ങൾ തോറ്റു. വാശിക്ക് കുറച്ചു കൂടി നല്ല ടീം ആയിട്ട് പോയി പിന്നൊരു പ്രാവശ്യം ഞങ്ങൾ ജയിക്കുകയും ചെയ്തപ്പോ സമാസമം.. ഇന്ന് ലബ്ബർ പന്ത് കണ്ടപ്പോൾ ആ കൈലി ഉടുത്ത ചേട്ടനെ ഓർമ്മവന്നു..
ഇനി സിനിമയെ കുറിച്ച് പറഞ്ഞാൽ
നമ്മുടെ അയ്യപ്പനും കോശിയും കണ്ടിട്ട് എഴുതിയ കഥ ആണെന്നും, ഈ വർഷം തമിഴിൽ ഇറങ്ങിയ ഏറ്റവും നല്ല പടങ്ങളിൽ ഒന്നാണെന്നും ഒക്കെ കേട്ടിട്ടും കാണാൻ ഒട്ടും താല്പര്യം തോന്നാതിരുന്ന സിനിമയായിരുന്നു ലബ്ബർ പന്ത്.
സാഹചര്യവശാൽ ott വന്നപ്പോൾ ഒരു പത്തു മിനിറ്റ് കണ്ടിട്ട് എഴുന്നേറ്റ് പോകാമെന്നു കരുതി കണ്ടു തുടങ്ങിയതാണ്, പക്ഷേ മുഴുവൻ കണ്ടിട്ടേ എഴുന്നേൽക്കാൻ പറ്റിയുള്ളൂ, അതും സിനിമ ഇത്ര പെട്ടന്ന് തീർന്നോ എന്നോർത്തു അത്ഭുതവും തോന്നി.
സിനിമ കാണാൻ താല്പര്യം തോന്നാതിരിക്കാൻ കാരണം ക്രിക്കറ്റ്‌ ആയിട്ട് വലിയ ബന്ധമൊന്നും ഇല്ലാത്തോണ്ടാണ്. കളിക്കാൻ ശ്രമിച്ചിട്ടും വഴങ്ങാതെ വന്നപ്പോ ഉപേക്ഷിച്ചതാണ്.
ടീവിയിലും കാണാതെയായിട്ട് വര്ഷങ്ങളായി, ഇപ്പോൾ വാർത്തകളിൽ കൂടി മാത്രമാണ് ക്രിക്കറ്റ്‌ ലോകത്ത് എന്ത് നടക്കുന്നു എന്നറിയുന്നത്.
എന്നാൽ എന്റെ ഒരു കൂട്ടുകാരനുണ്ട്, ക്രിക്കറ്റ്‌ എന്നാൽ ജീവനാണ്, എവിടേലും കളി ഉണ്ടെങ്കിൽ കല്യാണരാമനിൽ mr പോഞ്ഞിക്കര മദ്യത്തിന്റെ മണം പിടിച്ചു വരുന്നത് പോലെ അവനും ഗ്രൗണ്ടിൽ എത്തും കളിക്കും.
അവൻ കളിക്കുന്ന ഒന്ന് രണ്ട് ടൂർണമെന്റ് കാണാൻ പണ്ട് എന്നെയും വിളിച്ചുകൊണ്ടു പോയിട്ടുണ്ട്, ഈ ലോക്കൽ ടൂർണമെന്റ് ഒക്കെ നടക്കുമ്പോൾ അവിടെ ചില താരങ്ങൾ ഉണ്ടാവാറുണ്ട്, അവർക്ക് ചില പ്രിത്യേകതകളും അവരുടെ വീര കഥകൾ പറഞ്ഞു രോമാഞ്ചം കൊള്ളുന്ന ഫാൻസും ഉണ്ട്.
അങ്ങനെയുള്ള ആളുകളെയും ഇങ്ങനെ ഒക്കെ സംഭവങ്ങളും ഉണ്ടെന്നൊക്കെ അന്ന് അവന്റെ കൂടെ പോയപ്പോഴാണ് ഞാൻ ആദ്യമായി കാണുന്നത്.
ഈ സിനിമ കാണാൻ തുടങ്ങിയപ്പോൾ അതുപോലെ ഒരു കഥാപാത്രത്തെ കാണിച്ചുകൊണ്ടാണ് തുടങ്ങിയത്. ഒരു കൈലി മുണ്ട് ഉടുത്തു ബാറ്റിന്റെ പിടിയിൽ തൂവാല ചുറ്റി വരുന്ന, ആദ്യത്തെ ബോൾ മുട്ടിയിടുന്ന, പിന്നീടുള്ള എല്ലാ ബോളും നിലം തൊടാതെ പറപ്പിക്കുന്ന പൂമാല, കഥയിലെ നായികയുടെ അച്ഛൻ കഥാപാത്രം.
തന്റെ ഭാര്യ കാണാതെ ക്രിക്കറ്റ്‌ കളിക്കാൻ പോകുന്ന ശരാശരി നാട്ടിൻപുറത്തെ ക്രിക്കറ്റ്‌ പ്രേമി.
ഒപ്പം സ്വന്തമായി ഒരു ടീമിലും സ്ഥാനമില്ലാത്ത ആര് വിളിച്ചാലും കളിക്കാൻ പോകുന്ന, എന്നാൽ നന്നായി കളിക്കാൻ അറിയാമെങ്കിലും അവഗണന മാത്രം ലഭിക്കുന്ന നായകൻ അൻപ്...
അയ്യപ്പനും കോശിയിലും ഉണ്ടാവുന്ന പോലെ കളിക്കളത്തിൽ വച്ച് ഇവർ തമ്മിലുണ്ടാകുന്ന ഒരു ഈഗോ ക്ലാഷ്, അതോടൊപ്പം ഇനിയെന്ത് സംഭവിക്കുമെന്ന് പിടി തരാതെ പോകുന്ന കഥയും.
ഒരു മസ്റ്റ് വാച്ച് ഐറ്റം തന്നെയാണ്.. ക്രിക്കറ്റ്‌ ഒന്നും കളിച്ചിട്ടില്ലാത്ത എനിക്ക് തന്നെ ഇത്രയും എഴുതാൻ തോന്നിയെങ്കിൽ പണ്ട് നാട്ടിൻപുറങ്ങളിൽ ഇതുപോലെ കളിച്ചിട്ടുള്ളവർക്ക് തീർച്ചയായും ഒരു നല്ല നൊസ്റ്റാൾജിയക്ക് കൂടിയുള്ള വകുപ്പ് കൂടിയാണ്...
നല്ല കഥയും നല്ല അവതരണവും... അവസാനം ഒക്കെ 🔥🔥
ഇതുവരെ കണ്ടിട്ടില്ലാത്തവർ കണ്ടുനോക്കുക ഇഷ്ടപ്പെടും.. 👌🏻
ഒരാളുടെ കാര്യം കൂടി പറഞ്ഞില്ലെങ്കിൽ ശരിയാവില്ല.. കോളേജ് കഴിഞ്ഞു എല്ലാവരും പല വഴിക്ക് പോകുന്നതിന് മുന്നേ കുറച്ചു നാൾ ഞങ്ങൾ ക്രിക്കറ്റ്‌ കളിക്കുമായിരുന്നു, കളിക്കാൻ അറിയില്ലെങ്കിലും ആ കൂടെ കൂടുമ്പോൾ കിട്ടുന്ന ആ ഒരു ഫീലിന് വേണ്ടി ഞാനും പോകുമായിരുന്നു.
കോട്ടയം നാഗമ്പടത്തുള്ള അന്താരാഷ്ട്ര ക്രിക്കറ്റ്‌ സ്റ്റേഡിയത്തിലായിരുന്നു ഞങ്ങൾ കളിച്ചിരുന്നത്, കോട്ടയം വഴി പോയിട്ടുള്ളവർ എല്ലാം ഈ സ്റ്റേഡിയം കണ്ടിട്ടുണ്ടാകും, മഴക്കാലത്തു വള്ളം കളി വരെ അവിടെ നടത്താറുണ്ട്. 😅
അപ്പോൾ ഒരു ദിവസം ഞങ്ങൾ കളിക്കാൻ തുടങ്ങിയപ്പോ ഒരു പയ്യൻ വന്നു അവനെക്കൂടി കൂട്ടുമോ എന്ന് ചോദിച്ചു.
സംസാരിച്ചു വന്നപ്പോ അവൻ ഈ നാട്ടുകാരനെ അല്ല, പത്തനംതിട്ടയിൽ നിന്നോ മറ്റോ എറണാകുളം പോകുന്ന വഴി ബസിൽ ഇരുന്നു ആശാൻ ഞങ്ങൾ കളിക്കാൻ ടീം ഇടുന്നത് കണ്ടിട്ട് അടുത്ത സ്റ്റോപ്പിൽ ചാടിയിറങ്ങി വന്നതാണ്..
അവൻ വന്നതും വെറുതെ ആയിരുന്നില്ല, നല്ല കിടിലൻ കളിയും കളിച്ചിട്ടാണ് യാത്ര പറഞ്ഞു പോയത്..